நாட்டு நடப்பு

வட்டமிடும் காளையரும் வாள்விழியை வீசி,
வளையவரும் பூவையரும் பார்வைசுகம் காண்பர்.
மட்டரக சரக்குவிற்கும் வணிகரையும் கொண்ட
மரியாதை அற்றதொரு சந்தையது தேக்கா!
எட்டுமணி அதிலிருந்தே எட்டுமணி வரைக்கும்
என்னென்பேன்,பங்குசந்தை பரபரப்பு போலாம்.
வெட்டிமுறிக் கின்றவரோ?வேட்டையிட வந்தார்.
வேண்டாமே!ஞாயிற்றுக் கிழமைவர வேண்டாம்.

எள்ளிடவும் இடமில்லை,எங்கணுமே தலைகள்
இரத்தம்போல் சுழன்றுவரும் பணவோட்டம்;கூட்டம்
தள்ளிடவும் இடறிடவும் தாவிடவும் செய்யும்.
தணிக்கைப்போல் குடிநுழைவுத் துறையினரும் உலவும்
கொள்ளிடம்போல் வீதிகளில் கற்பனைகள் கோடி.
கொள்ளிப்பேய் குதர்க்கப்பேய் முகவரிகள் கொண்டோர்
அள்ளிடுவோம் செல்வமென ஆசையலை வீச
அடிதடியும் குடிவெறியும் அரங்கேற்றுகின்றார்.

பண்டிகைநாள் புற்றீசல் அங்காடி வைத்து,
பழசுகளைப் புதுசுகளாய்ப் பதப்படுத்தி விற்க
சண்டியரைத் துணைவைத்து மடிபிடிக்கும் வணிகம்
சற்றேனும் கூசாமல் செய்கின்றார்;சீச்சி!
வண்டிகளோ தேக்காவில் சாலைவிதி திணற
வருவார்க்கும் செல்வார்க்கும் நாகரிகம் கூச;
முண்டைகளும் மோழைகளும் நடுவீதி மறிக்க
மோசடியார் சிலபேரால் முகம்போச்சு நமக்கே!
----------------------------------


"ஆடம்பரம்"

தீபாவளிப் புடவைக்கும் தீராவெறி நகைகட்கும்
தேறாதடி விருந்துக்கும் சம்பளங்கள்.-அடி
மாபாவியென் றமைந்தாயே!மாறாதவுன் பகட்டுக்கு
மடியேந்திடஎவர்காலில் போய்விழுவேன்?

நாயாயலைந் தடிநாக்கு மோவாய்வரை வெளிதள்ள
நாடாதவர் சிலர்நட்பைப் போயிரந்தேன்.-வெறும்
வாயால்சிலர் நலம்கேட்டார்,"வாய்யா" என,வசைவைத்தார்
"போய்வா"எனச் சிலர்போனார்,வாய்மறந்தேன்

பிறப்பானது வரமென்பார். நமக்கோஅதில் வரமைந்து
பேய்ப்போன்றது பிழைகொண்டு தோன்றியது.-இதை
மறப்போமென துறவுக்கே மனம்மாறிடும் பொழுதெல்லாம்
மரியாதையை அதுபோக்கிடும் என்றிருந்தேன்.

தேநீர்க்கடைச் சந்திப்பில் ஒருநாளொரு துணைநண்பர்
தெரியாதது போல்நடந்தார்,நான்மறித்தேன்.-அட
ஏன்,நீர்மறந் தீரென்றேன்."தீபாவளி அலைச்சல்தான்,
இருந்தால்கொடும் இருநூறே"என்றிரந்தார்.

கை,ஈபவன் மரப்பாவை,கால்காட்டுவன்,திருப்பாவை
காட்டாதன உரு,காட்டிடும் அக்கடவுள்-ஐயோ!
மெய் ஈபவன் எனச் சொன்னார்.வெறுமேவரும் திருநாளால்
மிதிபட்டிட எனைவைத்து விட்டவனே!

சூறாவளி எனவந்த தீபாவளி இடிபாட்டில்
சுக்கானதென் மனமெல்லாம் சிரித்தழுதேன்.-வழி
மீறாதயிவ் வழிபாட்டில் யார்மானமும் போனாலும்
வீட்டோடழு வெளியில்போய் புன்னகைப்பாய்.
---------------------------------